Lleolir Ysgol Gynradd Rhiwfawr mewn pentref bach ym mhen uchaf Cwm Tawe yn sir Castellnedd Port Talbot. Mae'r pentref tua dwy filltir o Ystalyfera ac Ystradgynlais, a phymtheg milltir o Abertawe.

Mae ynddi tair ystafell ddosbarth, neuadd, ystafell adnoddau, ystafell y Pennaeth a thoiledau. Mae'r iard fawr ar ddwy lefel o'i chwmpas.

Mae pob agwedd o'r Cwricwlwm wedi ei integreiddio o fewn fframwaith o ddysgu thematig. Rhoddir pwyslais ar gynnig profiadau uniongyrchol a gwerthfawr i'r plentyn.

Cymraeg yw'r iaith ddyddiol o fewn yr ysgol, a chyfrwng ieithyddol y dysgu yn y babanod. Dysgir y plant yn ddwyieithog yn yr Adran Iau.

Ar hyn o bryd, mae 43 o blant ar y gofrestr, gyda'r mwyafrif ohonynt yn byw o fewn tafliad carreg o'r ysgol. Mae'r plant yn cael eu dysgu mewn dosbarthiadau oedran cymysg - Meithrin, Derbyn, Blwyddyn 1 a 2 mewn un dosbarth, Blwyddyn 3 a 4 gyda'i gilydd a Dosbarth 5 a 6 gyda'i gilydd. Felly, mae cynllunio'n fanwl yn rhan bwysig iawn i bob aelod o'r staff er mwyn sicrhau cynnydd a datblygiad y plentyn.

Mae nature ieithyddol yr ysgol a'r pentref wedi newid cryn dipyn ar hyd y blynyddoedd diwethaf, gyda nifer sylweddol o fewnfudwyr wedi ymgartrefu yn y pentref. Heblaw am ymhlith henoed y pentref, ar y cyfan, Saesneg yw iaith gyfathrebu trigolion y pentref.

Ymfalchiwn yn y ffaith fod yr ysgol yn gwneud cyfraniad sylweddol i fywyd y pentref. Mae'n ganolfan naturiol a manteisir ar y cyfle i estyn gwahoddiad i rieni a phentrefwyr i ymuno yng ngweithgareddau'r ysgol. Yn ogystal, gwnawn ddefnydd o arbenigedd lleol er mwyn cyflwyno addysg fyw a pherthnasol i'r plant.

Fel staff, rydym yn cynllunio yn wythnosol ac ar ddiwedd pob wythnos rydym yn adolygu ein gwaith. Mae'r adolygiad, felly, yn arwain at ein cynllunio am yr wythnos canlynol. Eleni rydym yn treialu system newydd sef dysgu hanes a chelf am yr hanner tymor cyntaf a wedyn daearyddiaeth a thechnoleg am yr ail hanner o'r tymor.

Mae'r ysgol newydd dderbyn y Marc Safon am ddysgu rhifedd a llythrennedd.